රාජ්‍යයක අයිතිය ප්‍රකාශ කිරීමට රාජ්‍ය ලාංඡනය යොදා ගැනේ. ශ්‍රී ලංකාව බ්‍රිතාන්‍ය යටත් විජිතයක් ව පැවති සමයේ දී පවා මෙරටට රාජ්‍ය ලාංඡනයක් තිබිණි. එහි සංකේතය වූයේ සිංහයා සහ කඟෙව්නා ය.නිදහස ලැබීමෙන් පසු වක්‍රයක් තුළ සිංහ ලාංඡනය හා වටේට පලාපෙති මෝස්තරයක්, මුදුනෙහි ඔටුන්නක්, සිංහ රූපයට පහතින් ‘ලංකා‘ යනුවෙන් සඳහන් වූ රාජ්‍ය ලාංඡනයක් භාවිතා කෙරිණි. වත්මන් රාජ්‍ය ලාංඡනය හදුන්වා දුන්නේ 1972 ජනරජ ආණ්ඩුක්‍රම ව්‍යවස්ථාව යටතේ ය.
ජනරජ දින උත්සවය සැමරීම සඳහා ජාතික ලාංඡනයක අවශ්‍යතාව මතු වූ අතර ජනරජය සඳහා ලාංඡනයක්
සැකසීමට කමිටුවක් පත් කෙරිණි. නිශ්ශංක විජේරත්න, ආචාර්ය නන්දදේව විජේසේකර, ආචාර්ය සෙනරත් පරණවිතාන, එච්.ආර්.පේරමරත්න, රෝලන්ඩ් සිල්වා, ආචාර්ය මැකී රත්වත්තේ සහ මහගමසේකර යන විද්වත් පිරිස එම කමිටුවේ සාමාජිකයෝ වූ හ. එවකට සංස්කෘතික කටයුතු අමාත්‍යාංශයේ ලේකම් මෙන් ම රාජ්‍ය ලාංඡනය හා ශ්‍රී ලංකා ජාතික ධජය නිර්මාණ කමිටුවේ සභාපති වශයෙන් කටයුතු කළ ආචාර්ය නිශ්ශංක විජයරත්න මැතිතුමාගේ මග පෙන්වීම හා උපදෙස් මත චිත්‍ර ශිල්පී එස්. එම්. සේනාරත්න විසින් රාජ්‍ය ලාංඡනය
නිර්මාණය කළේ ය. මේ ආකාරයට නිර්මාණය කළ රාජ්‍ය ලාංඡනයේ වර්ණ යෙදීම සඳහා මාපලගම විපුලසාර හිමියන්ගේ ද උපදෙස් ලැබිණි.
රාජ්‍ය ලාංඡනයේ ඇති සංකේත මගින් ප්‍රකාශ වන විවිධ අර්ථ.
පුන්කලස - සෞභාග්‍යය
වී කරල් දෙක - සශ්‍රීකත්වය හා සෞභාග්‍යය
ඉර හා හඳ - ජාතීන් ඉර හඳ පවතින තාක් කල් පැතිරේවා
සිංහයා - ජාතියේ සංකේතය
සිංහයා කඩුවක් දරා සිටීම - ප්‍රෞඩත්වය
නෙළුම් මල් මෝස්තරය - පිරිසිදු බව
ධර්ම චක්‍රය - බහුතරයේ ආගම වූ බුද්ධාගම
මායිම් රේඛාව - සියලු කරුණු ඒකීය රාජ්‍යයක් යටතේ පවතින බව
රාජ්‍ය ලාංඡනයේ සංකේතවලින් දැක්වෙන්නේ“ධාර්මික,ප්‍රෞඪ ජාතිය,ඉර හඳ පවත්නා තාක්කල් සශ්‍රීකත්වයෙන් පරිපූර්ණ වූ සෞභාග්‍යමත් ජාතියක් ව දිනේවා!” යන පැතුම යි.
රාජ්‍ය ලාංඡනය භාවිතා කිරීමේ අයිතිය ඇත්තේ ශ්‍රී ලංකාවේ ජනාධිපතිවරයාට පමණ යි. 1972 මැයි 22 වැනි දින අංක 3/3/54 දරන ගැසට් පත්‍රෙයන් රාජ්‍ය ලාංඡනය ප්‍රසිද්ධියට පත් කර ඇත.
වර්තමාන ජනාධිපතිවරයා වන ගෝටාභය රාජපක්ෂ මහතා විසින් සියලු රාජ්‍ය ආයතන වල ජනපති රුව ප්‍රදර්ශනය කිරීම වෙනුවට රාජ්‍ය ලාංඡනය ප්‍රදර්ශනය කිරීම අනිවාර්ය කොට ඇත.
No comments:
Post a Comment